المساعد الشخصي الرقمي

مشاهدة النسخة كاملة : عندك بطحة ؟؟؟؟؟ جيبها وتعال هنا



MaD MaRYaM
, Mon, 13 Oct 2008 02:19:09 +0200
مساء وصباح الخيرات عليكم


طبعآ بعضكم مستغربين من العنوان
بس الاعضاء الي عايشيين بالعراق اتصور العنوان مو غريب عليهم


بس يمكن الي عايشين بالخارج مسامعين بكلمة ( بطحة )


بطحة هي عبارة عن ماطور او دراجة سباق واتصور الكل شايفيين دراجات السباق وشلون تصير وشكلها


وهذه الدراجة تمتلك سرعة غير اعتيادية


وحتى يمنع استخدامها بالطرق العامة والشوارع المزدحمة


لانها دراجة سباق ومتمشي الا بسرعة معينة وسرعة كلش قوية


ولازم تكون على الطرق العامة لان اذا تشتغل بعد ما تتوقف !!!


ادري بيكم صافنيين ودتكولون شنو عدنا درس عن الدرجات


موضوعي اليوم هو عن الدرجات والموطور البطحة بالتسمية العراقية الحالية


طبعآ هذه الماطورات انتشرت بالفترة الاخيرة بالعراق
واستهوت قلوب الشباب
يعني هسة اغلبية الشباب صاروا يملكون ماطور ( بطحة )


وديستخدمون هذه الدرجات استخدام جدآ سيء
وبطريقة متهورة !!!!!!!!


بحيث بشوارع بغداد ديقيمون مسابقات ورهانات بالدراجات


ورهانات تكون اما عن فلوس او عن الدراجة نفسها


طبعا اني حددت بغداد بالذات لان هذه الرهانات منع قيامها بمحافظتنا


والاسباب تعود الى تهور وطيش شبابنا


لان هواية شباب ماتوا جراء هذه السباقات الخطرة !!!


وطبعآ ما احجيلكم عن صوت هذه الدراجة المزعج جدآ جدآ


بحيث اذا تفوت بشارع غير مبلط تكلب الشارع ترابة


واني هنا حبيت اناقش هذا الموضوع وياكم


شبابنا شنو رأيكم بهذه الظاهرة؟


انطباعكم عنها؟


تعتبروها صح او غلط سلبياتها ايجابيتها بنضركم انتوا؟؟


مدى خطورتها على الشباب؟


واضيف الكم انه هنا الشباب الي يستخدمون هذه الدراجة


يستخدموها بدون ان يلبسون واقية على راسهم
لان يعتبرون الي يلبس الواقية والاغراض الي تحميه من الحوادث


يعتبروه شخص يتعيقل او يفيك
وبنضرهم ما الها داعي للوقاية
!!!!!!!!!!!!!


واضيف الكم انه اولاد عمامي يمتلكون من هذه الدراجات
وبعض منهم ايضآ يستخدمها بصورة طيش وتهور


ولحد الان اتذكر كلام جدي عن اصحاب الدراجات ( البطحة )


كلام ما اكدر اذكره هنا


بس حقه جدي يتكلم عنهم


لان فعلا الشباب ديستخدمون هذه الدراجات بصورة طائشة جدآ


وهواية حوادث صارت وهواية شباب ماتوا بسبب ( البطحة )


بطحة واسمها عليها


وهي تختلف عن الماطور او الدراجة العادية


اسفة اذا طولت بالكلام


واسفة اذا ازعجتكم


بس اتمنى ان اشوف ردودكم


:f_waterheartm_ecac8:3473749b:

اسد الدورة
, Mon, 13 Oct 2008 05:09:00 +0200
عاشت ايدج يا مبدعة علة الموضوع
هية ظاهرة الرهانات اكيد مز زينة ور اح يتاثر بيهة الشاب و لا سامح الله بوحده بيهن ينسحك و يروح بيهة
هية حلوة البطحة من واحد يفتر بيهة بلشارع خاثة العصرية جان عدنه شباب بلدورة مسوين كروب و يفترون العصرية بلشارع بس بعقلانية اما اذا تصير بيهة سباقات يمكن يدعمله واحد ماله دخل
تحياتي
اسودي

Ali Al-Mosawi
, Mon, 13 Oct 2008 07:34:19 +0200
مريم ممكن تجيبين صوره للبطحه
هع
لان لهسه مو واصله لمخي
اكو شغلتين بمخي و مو عارف يا وحده تقصدين خخخ
و موضوعج حلو و لو اني مو ستوعب كلمه بطحه

El Mariachi
, Mon, 13 Oct 2008 08:04:37 +0200
مريم ممكن تجيبين صوره للبطحه

هع
لان لهسه مو واصله لمخي
اكو شغلتين بمخي و مو عارف يا وحده تقصدين خخخ
و موضوعج حلو و لو اني مو ستوعب كلمه بطحه


7ubi.... She means .... street racing Bike

El Mariachi
, Mon, 13 Oct 2008 08:12:01 +0200
بالنسبة الي اعتبرهة ضاهرة اعتيادية يتمتع بيهة الشباب بكل انحاء العالم
كل واحد يريد يطلع عضلاتة ويكول اني الاحسن بهوايتة

وللعلم سباق الدراجات يعتبر رياضة مو مضيعة وقت ... بس المفروض استخدامهة بصورة صحيحة يعني مو بنص الشوارع العامة

وبالنسبة للعراق السبب هوة ماعدنة مكان خاص بهاي الرياضة وهذا الي يدفع الشباب ان ينتقلون بالشارع

اما بالنسبة للرهانات ...... هم كولش عادي .. والمسألة ميحتاج نشوفهة من الجانب السئ
مثل البليراد او المنظدة ........ الخسران يدفع فلوس الگيم

واني مشتاق لسباق السيارات ... لان صار هواية ممتسابق وية واحد

ومثل ماضاهرة سباق الدرجات ........ اكو سباق السيارات

وهاي وجهة نظري اني

تحياتي

ς я ά z ү
, Mon, 13 Oct 2008 09:20:27 +0200
يمنا ماكو هالسوالف ,,,
بس بشكل عام الشباب يحبون السرعه والاثاره وهيج اشياء
ما توفرها الهم الا البطحه

طبعا هي بيها نوع من التهور اكيد من تصير رهانات وسباقات
لكن المراهق ما يحسب ولا يفكر بهالطريقه
كل همه ان يثير اعجاب ويلفت انظار وبس


نورتينا مريومه
موضوع جديد عالقسم

» j υ м α п «
, Mon, 13 Oct 2008 10:34:50 +0200
اممممممممممم
والله اني اشوفها كلش خطرة خاصة بهيج عمر لان يكون متهور وطائش ومرات تخرج عن ارادته ويسحكله واحد
خلي احجيلج على هيج موقف صار بابن خالي واسمه يوسف (شفتي كل يوسف يعني وكيييييييييييييييح ابد ما يكعد راحة هع)
احنا منطقتنا بالمنصور يسوون هاي السباقات بالفروع مو بالشارع العام وطبعا هاي اخطر لان المساحة تكون اصغر وعدد المتسابقين هواية
كل يومية ينبطحون شلون بطحة بحيث نسمعها كلش قوية واني اكول هذا راح بيها اكييد ويكوم بعدين ولا عبالك اكو شي هع
وطبعا يوسف عجبته الشغلة وكال خلي اجربها اني هم شمعنه بس همة ؟؟
ركب بيها وماادري شلون فلتت منه مسيطر عليها وانجبح شلون جبحة بس الله ستره
اجانا للبيت الدماية كلها مغطية جسمه وملابسه متشككة متعرفين احنا شصار بينا ذاك اليوم وفوكاها يضحك الافندي وبعدين ابوية عالجه والحمدلله صار زين
......
مريوم خوش موضوع
عاشت ايدج حبي

قديس
, Mon, 13 Oct 2008 11:35:31 +0200
هع خويه جا اتي ششايفة

عمي خلوهم الشباب علقولة المثل من لم يمت بالمفخخة مات بالبطة العفو البطحة

هو احنه هيج بس السوء فوالح نواجب

RaHeeF 86
, Mon, 13 Oct 2008 13:27:10 +0200
هلووو
طبعا جذبني الموضوع هع لانه اني سائق بطحة
طبعا بالداية ماكو شي اسمة مراهنات بس اكو سباقات واستعراضات
السباقات جوة جسر الجادرية بالساحات والسباقات على الجسر
وكل يوم جمعة بس وميبطلون الة واحد ينكلب يلة


واني شابع كلبات بس بطلت بعد ما انكلبت وطلعت من الموت


واني عندي كلاسك وام الكفرات


هاي صورة للكلاسك وبعدين اجيبلكم ام الكفرات لانه اني على حاسبة ابوية وهاي الصور اني رافعها قديمة على مستر


http://www.mriraq.com/vb/imagehosting/1048f2f1019d43a.jpg



http://www.mriraq.com/vb/imagehosting/1048f2f1016c331.jpg



هاي الدراجة يسموها باندا
بس باعوا التاير اويلي الله هع
والصراحة هسة الجو مالتها وخصوصا العصر بيها وكم مو طبيعي هع


تحيااتي

ديالى
, Mon, 13 Oct 2008 13:33:37 +0200
طبعا الموضوع كلش مهم ولازم تنحطلة قوانين ع الاقل يسوولهم
حلبة خاصة بيهم.
بس طبعا هذا الحجي بعد 100 سنة ما يصير حاله حال باقي الامور
وتعرف مريم اخوية الصغير لمو الوالد مسيطر علي هم كان راح بيها
والله من رحت لبغداد انصدمت بالشباب يعني فوك خطورة الدراجة
يطلع الشاب سكران وانجنيت رجعت لبعقوبة بساع وكأني رايحة
جنت لبلاد العجائب يعني الي يشوف ان التطور يكون بهيج طريقة
اسمحولي ( عمت عينه على هيج عقلية)

Ω Μя ф Ĥύήťέя Ω
, Mon, 13 Oct 2008 14:30:49 +0200
اولا حبيت اشكرج مريم على هذا الموضوع
واني من رأيي
الدراجات البطحة كلش حلوة وتعجبني
بس الشي الوحيد بيهة خطرة كلش
وخاصة شباب منطقتي كلهة تستخدمهة
وهية طبعا هواية كلش حلوة بس مو مال مراهنات
وحتة سيارات هنا هم
تصير سباقات يمنة همينة
وطبعا كل السيارات 2008 اليتسابقون بيهة
هههه
اني هذا رأيي
مشكورة مريم على الموضوع مرة ثانية

ς я ά z ү
, Mon, 13 Oct 2008 16:17:14 +0200
http://www.mriraq.com/vb/imagehosting/1048f2f1016c331.jpg








الظاهر اني هم رح اصير من معجبين البطحات ,, هع

نايس بطحه صديقي

ازهار الخريف
, Mon, 13 Oct 2008 21:34:03 +0200
اكثر شي يزعجني هو من يزرفون الصالنصة حتى يصير صوتها عالي
وهالشي مو بس بالعراق
حتى من جنا بالخليج وحتى بسوريا

وصوتها كلش مزعج

بالاضافة الى انه راكب البطحة ظهرة لازم يكون منحني
ومن يسوق لمسافات طويلة تحمى وتأذي رجليه

وفوك كل هذا
يعتبرون الي يلبس كسارات وخوذة ديفيك!!!!!!

əiɧaɱ
, Tue, 14 Oct 2008 04:01:01 +0200
ههههههه خوش موضوع و غريب

دومكم مميزات بنات بعقوبة بمواضيعكم و من صدك شموع القسم انتوا


بالنسبة الي ما احب البطحة ولا باقي أنواع الدراجات..ما ادري كلششش مو صداقة وياهم..

RaHeeF 86
, Tue, 14 Oct 2008 05:22:33 +0200
وكحة هاي بيها شلعة اتشيل التبليط هع
اشتري وحدة وجاوف بحياتك هع

فنفونة
, Tue, 14 Oct 2008 06:11:02 +0200
حبيبي مريومة مطالعةبالشارع حتة اعرف اكو ناس تركب بطحة لو لا هع هع
بس اكرة الماطورسكل اني
:144:
احب البايسكلات هع بس اذا ركبت بايسكل ببغداد
راح اعتبر اسوء مخلوق عرفة المجتمع العراقي على مر التاريخ ّّ!!

الكوردي
, Tue, 14 Oct 2008 13:24:05 +0200
قبل الحرب سواق لدراجات الجبيره جانو مشبوهين ومن ضمنها سواق البطح
(التسمية الاصلية دراجة بطح مو بطحة) والصغيره عادي
من جنت بالمتوسطة جان عدنا دراجه اني واخويه جانت سوزوكي ونسميها تونة الحنونة الله يذكرها بالخير
بس وره الحرب لا صارت عادي وصارت كنوع من الحلول للازدحام والبانزين بساللي يريد يخلص من الازدحام ما يشتري بطح يشتري دراجة عادية صغيره
بصراحه هيه الدراجة كللش تونس لابعد الحدود وخاصة اذا جانت نشطة (مكينة 400 وفوك هعهع)
بالنسبة للسباقات اني اشجع الشباب عليها وجانو مرات يسووها بالبحيرة مال جادرية وهسه يمكن بالقادسية بنزلة الجسر واشجعهم عليها كنوع من التغيير وكسر النمط الرتيب للحياة
من الكلية لحد هسه عاجبني اشتري دراجة والوالدة ما تقبل تكولي اخاف عليك من الدراجة (هعهع ولا عبالك جنت اروح لابو غريب والشعلة والمدائن بايام الذبح والصك)
بالنسبة لكونها خطرة او لا فهاي تعتمد عالسايق وبالنسبة للخوذة هيه ضرورية مو تفياك وبالعكس اللي يلبسها اريح لان اغلب المستجدين من يصعدون دراجة والهوى يصير بعينهم يدمعون ف لو نجي للواقع هيه هم مال مستجدين وهم ضرورية يعني مو تفياك بس هيه كللش ضرورية لان اخويه من جان عدنا دراجة يومية مسكط بنطرون ورجله مدماية (اني ما انكلبت بيها ههعهعهع)

RaYaH
, Tue, 14 Oct 2008 13:58:53 +0200
الموضوع حلو وهوايه الدراجات حلوه بس خطره لان يكلون الماطور <البطحه> كتال صاحبه

MaD MaRYaM
, Wed, 15 Oct 2008 00:30:07 +0200
تسلمولي ع الرودو

وجنت اتمنى ارد عليكم واحد واحد بس ماعندي مجال
وقتي جدآ محدود
بسبب المدرسة
بس فعلا ردودكم اسعدتني

نمور البطحة يعني دراجة سباق وهذه الي نزل صورتها دعفوص حشاش
هي هذه البطحة

وان شاء الله اذا صار عندي مجال انزل صور بطحات ولد عمامي

انوس دير بالك من البطحات

ايهوووم ابقى على هذا الحال احسن
لان والله البطحة جدآ خطرة

الكوردي عفية بأمك لان الماطور فعلا وعلى كولة ريا كتال صاحبه

وهي صح تعتبر رياضة للشباب وتغير من روتيين حياتهم
بس المفروض يستخدموها بالشكل الصحيح

ابو نشوه
, Wed, 15 Oct 2008 15:43:47 +0200
شكرا يا اختي العزيزه على الموضوع ؟؟ لكن مو كل الكلام صحيح لئن الي تحجين عليهم بعدهم صغار ومراهقين بس اكو شباب ينطون حق الدراجه والشارع من يصعد
؟ بس بصراحه تسلمين على الفكره

MeMoOo IRaQIa
, Thu, 16 Oct 2008 01:08:54 +0200
عاشت ايدج استفاديت من موضوعج لاانو عرفت معنى البطحه شنو مشكوووره

MaD MaRYaM
, Thu, 16 Oct 2008 14:24:17 +0200
يسلملي مروركم منورين

جمانة عااااااا هذا ابن خالتج مثل ابن عمي
هم دائمآ يسوي حادثة بالبطحة
ومن عدا العركات هع